لا تظلموا الحمير

حرام علينا لو ظلمنا الحمير و قلنا ان اللى بيخطط او ينفذ الحلول المرورية ممكن يكون حمار لان ده فيه ظلم بين للحمير ، تلك المخلوقات الغير ناطقة و التى تتميز بقوة التحمل و حرام ان نقول انها لا تفهم ، اما من يقومون بتخطيط طريق او وضع تصور لحل مشكلة او ازمة مرورية فاعتقد انهم يفوقون الحمير و استميح الحمير عذراً و لكنها اللغة السائدة ، لذلك فارجوا من الحمير الحقيقيين الا يغضبوا، اما اصحابنا اياهم فايتفلقوا، كل يوم و لمدة خمسة سنوات متواصلة كان الطريق الى كوبرى القبة مغلقاً ، ليه ؟ لانه يتم تنفيذ كوبرى لحل مشكلة اشارة الزاوية ، فماذا تم ؟ تم انشاء كوبرى فوق اشارة الزاوية عابراً لشارع بورسعيد ، ثم بعده بمسافة صغيرة تم انشاء وصلة اخرى مربوطة بكوبرى القبة و هى اختراع مفتكس لمهندس عبقرى ، ليه بقى ؟ لانه حل مشكلة ركن السيارات و تم تحويل تحت الكوبرى لمركن و اعمدة و جنازير و سيارات داخلة خارجة لسكان المنطقة ، و يا سلام لو قابلت حد طالع من الجراج اللى بقى تحت الكوبرى و لازم يوقف الشارع عشان يعدل عربيته و تولع العربيات اللى ماشية فى طريقها ، ما هى منطقته و ده جراجه اللى بيركن فيه، و بعدين بقى نيجى للاخوة الجهابذة بالمرور ، هو اساساً الوصلة تعدى عربيتين بالعدد فيقوموا يقفلوا نص الوصلة بفاصل حديدى من بتوع اللجان عشان يقللوا الكثافة المرورية على كوبرى القبة و نقف نص ساعة و ساعة عشان نتحرك و كل ده بعد صبر خمس سنين لحد ما الكوبرى اللى كان مفروض يجيب الفرج يخلص ، و المشكلة كانت اساساً فى اشارة الزاوية و كان سببها الرئيسى عسكرى المرور و اللجنة اللى واقفة ليل نهار عشان تمسك اعداء الوطن اللى بيلفوا فى البلد ليل نهار، و كان حلها بسيط جداً بمحور صغير يعدى الاشارة فقط و شكراً لا و الادهى بقى ان الكوبرى الجديد حاجة ايه تجنن ، كوبرى صغير و بعامودين عشان الشركة المنفذة تعد امتار فى الخرسانة ، ما هى شركة قطاع عام و مكدسة بالعاملين و الموظفين اللى هما اساساً عالة على الشعب او على دافعى الضرائب و بالتالى لازم يقبضوا و لازم السيد المهندس مدير المشروع ياخد هبرته المحترمة اللى هى مكافأة المشروع و خلى الناس تموت من الغيظ و الحر و المرار من وقفتها فى الشارع عشان تعدى و تروح شغلها، مش فاهم جنس ملة العالم دى ايه، لو هى سرقة ماشى احنا راضيين تسرقوا بس اشتغلوا صح و كل ما هاتشتغلوا هاتزيد الهبرة برضه، ضيف على كده الاتوبيسات الضخمة اللى لسه نازلة و اللى عاملة زى عمارة متحركة مع ان المفروض نصغر حجم العربيات بس ما فيش فايدة، بجد حرام نظلم الحمير