اصلنا داقين عصافير

انا مش قادر امسك نفسى من الضحك ، يا جماعة حد يحاول يهدينى ، بعد ما شفت الاعلانات الجميلة بتاعة الانتخابات و حملة شارك برأيك ، لا و الانكت بقى اعلان وكيل النيابة و هو بيحقق مع المصرى و عاوزه يشارك ، طب و احنا لقينا مشاركة و ما شاركناش ؟ هو مين اللى خلى المواطن المصرى سلبى ؟ مش هو ده المصرى اللى خرج فى مظاهرات فى الثلاثينيات من اجل العودة للدستور ؟ مش هو ده المصرى اللى شارك فى ثورة 19 ؟ مش هو ده المصرى اللى عمره ما كان سلبى الا فى الثلاثين سنة اللى فاتوا ؟ بعد ما زهق و طلع روحه و روح اللى خلفوه من الشرطة و النظام و ألاعيب الانتخابات و بهدلتها ؟ فآثر السلامة و قالهم ما تولع ! الغريبة ان المفروض ان الانتخابات دلوقتى تبقى بالرقم القومى بعد ما روجوا لكده اثناء العمل بيه و انه هايبقى نقلة جديدة و مصر هاتدخل مصاف الدول المتقدمة، فين بقى ده و النظام مصر برضه على البطاقة الانتخابية، و اللى ليها الف حكاية و حكاية و كشوف الناخبين، انا جربت اعمل بطاقة انتخابية ايام الانتخابات اللى فاتت و شفت العجب، رحت القسم و سالت عن لجنة الانتخابات و بعد لف و توهان وصلت تخيلوا لقيت ايه ؟ اللجنة اللى موجودة فى القسم مين اللى ماسكها ؟ موظفين بالحزب الوطنى لا و ايه شوف بقى اول ما رحت لقيت مين ؟ حماده ابن ام حماده اللى كان بيلعب معانا زمان و ده مع احترامى ليه كان اعبط و اهبل خلق الله ، ربنا نفخ فى صورته و بقى موظف فى الحزب الوطنى اللى شغله فى القسم فى لجنة الانتخابات ، دخلت ايه ده اهلاً ازيك يا حماده ؟ بتعمل ايه هنا ؟ الغريب ان البيه وشه احمر و لقيته وقف و سلم على باقتضاب فهمت انه مش عاونى افضحه قدام زملائه مع انى ما كنتش هاعملها انا بس فرحت انى لقيت حد اعرفه عشان يسهل لى المهمة، قالى اامر ، قلت له عاوز اطلع بطاقة انتخابية، قالى يا راجل هو انت فاضى ؟ قلت لا مش مسالة فاضى ده حقى و لما سألت قالولى انها عندكوا هنا، قالى طول عمرك غاوى ثقافة و كلام كبير يا عم روح نام فى بيتك و ما تقلقش احنا هانعمل اللازم، قلت ازاى تعملوا اللازم ؟ انا عاوز بطاقتى و اشارك او ما اشاركش دى حريتى، و بعدين انتوا مش كنتوا قايلين ان كل حاجة هاتبقى بالرقم القومى ؟ لقيت كل اللى فى الاوضة بصوا باقتضاب و هو عينيه زغللت و زاد من اقتضابه اللى كان مصحوب بابتسامة صفراء ، باقولك ايه انت شكلك من العيال بتوع كفاية و الحركات دى و انا عشان عارفك مش هاعمل لك مشاكل ، قلت مشاكل ؟ و عيال ايه اللى انت بتتكلم عنهم ؟ انا رغم انى ما اعرفهمش بس دول ارجل منك و لا نسيت ياله ؟ فاكر ايام زمان و لا تحب افكرك قدام زملاتك ؟ لقيته اتعصب و قالى طب اتفضل بقى ورانا شغل و ما عندناش بطايق و بعدين انت مالكش بطاقة انتخابية و احنا بنطلعها بس لمواليد الثمانينات يلا بقى اتفضل من هنا، قلت نعم ؟ ثمانينات ؟ ايه خلاص شطبتونا من الوجود؟ ماشى يا حماده ع العموم انا هاتصرف ، قالى اعمل اللى انت عايزه، سيبته و مشيت لانى ما كنتش عاوز اكبر الموضوع بس دمى اتحرق و افتكرت طبعاً اننا جوه قسم بوليس و انتوا عارفين طبعاً ما هو قسم البوليس فى هذا الزمن و كمان ده عيل ، طلعت من هناك على قسم الساحل لان فيه صديق قديم بيشتغل ضابط بس انسان محترم جداً ، كلمته و انا فى الطريق ما ردش رحت طالع مباشرة ، لقيته مشغول فى محضر ، سلمت عليه و قعدت لحد ما يخلص ، و بعد السلامات حكيته له و مات من الضحك و قالى حماده عمل معاك كده ؟ بص بقى انت بتهرج ، انت شاغل نفسك قوى ليه كده بالموضوع ده ؟ قلت مش انتوا اللى بتقولوا لنا نشارك ؟ و لا دى مجرد اعلانات بس ؟ قالى يا عم مش هاينفع نتكلم هنا بس انصحك تنسى الموضوع او روح مقر الحزب الوطنى عندكوا و اسال على كشوف الناخبين هما عندهم سجلات بكل الناخبين فى الدايرة و لو حتى ما فيش بطاقة انتخابية ممكن يدوك رقم هو ده رقمك الانتخابى، مشيت من عنده على مضض انى اروح الحزب الوطنى بس قلت خلينى معاهم للآخر ، و رحت لقيت الحاج محمد راجل بجلابيه قلت اكيد من الخمسين عمال و فلاحين و ده بقى مسئول الحزب فى الدايرة، سلام عليكم و الله عاوز ادور على اسمى فى كشوف الناخبين ، رد : طيب اتفضل استريح دقايق و يجى الاستاذ عبده اللى ماسك الكمبيوتر، قعدت استنى استاذ عبده ما فيش فايدة لمدة نص ساعة، لما لقانى قلقت قالى يا بيه روح ما تقلقش ما فيش غرامة و لا حاجة لو ما شاركتش ، نام فى بيتك و ريح دماغك من الزحمة ووجع الدماغ، وقتها جه الاستاذ عبده و قعد على مكتبه و قاله يا سيدى الاستاذ مستنيك من بدرى و عايز يشوف اسمه فى كشوف الناخبين، بص بعدم اكتراث و بص لى بصة راجل من ايام الاتحاد الاشتراكى و التنظيم الطليعى ، و تمطع و قاله ماشى يا حاج اشغل الجهاز بس، و اخيرا اشتغل الجهاز و يلا بقى ندور ، بعد بحث و تنقيب استمر ربع ساعة كمان وصلنا لاسمى و الرقم الانتخابى و هاروح انتخب فى لجنة ايه كمان، حاجة جميلة خالص بس هو ايه اللى جابها عندهم مع انى اول مرة ادخل عندهم؟ ما علينا المهم ان الموضوع اتحل، طيب عاوز بقى اطلع بطاقة ، قالى خد الاستمارة دى و تملاها و تحط رقمك اللى لسه مطلعينه و تيجى بعد الانتخابات و هانعمل لك البطاقة، شكرته و حكيت له اللى حصل فى القسم ، فقالى ما هما تبعنا برضه و احنا بنعمل كده عشان كل ناخب بيطلع عينه عشان يجيب كشوف الناخبين بتوعه و يطلع لهم بطايق انتخابية و دى منافسه، قلت له بس هى المفروض تبقى بالرقم القومى، رد دى بقى مش بتاعتنا احنا ناس موظفين غلابه و ايه اللى رمانا هنا غير اننا عاوزين نشتغل، سلمت عليه و شكرته و شكرت استاذ عبده و مشيت ، تفتكروا عملت ايه بعد اللفة دى ؟ ما رحتش الانتخابات لا برلمانية و لا رئاسية ، ما هى باينه اهى، كل اللى عملته انى عديت على محل النابوليا بتاع ابو حماده اللى حكيت لكوا عليه فى الاول و اللى على طول ابوه و امه قاعدين قدام المحل طول النهار يتفرجوا على الرايح و اللى جاى، و قلت لام حماده على اللى ابنها عمله معايا ، قالت لى لا ازاى غلطان و انا هاوريه له بس لما يرجع ، ده انت حبيبى و بعدين ده انا هاجوزك بطه بنتى ، قلت فى سرى لا و النبى بلاش بطة دى ممكن تاكلنى او تعضنى ، و مرة تانية هاحكى لكوا على بطة لان ليها حكايات معانا كلنا و احنا صغيرين، انما بقى الاعلانات الجديدة دى حلوة و مصروف عليها من دمنا و دم دافعى الضرائب و فاكرينا داقين عصافير، اقطع دراعى انى ما معاييش بطاقة انتخابية و لا هاعرف اطلعها حتى تعالى فتشنى عشان تتاكد، تعالى فتشنى فتش