فاكرين الاستاذ يحيى الفخرانى فى فيلم الكيف و هو بيرقص فى آخر الفيلم بعد ما اتعلم اللغة و بقى يتكلم زى مزجانجى و البهظ ، اهو انا بقيت زيهم و اتعملت اللغة ، خير اللهم اجعله خير رحت الجراج كالعادة الصبح عشان اخد العربية و اروح الشغل ، اذا بى افاجأ بان مرايات الاجناب الاثنين مقطومين و واحدة واقعة على الأرض، المهم بعد سؤلات و شد و جذب مع الناس فى الجراج ، و يا باشا هانعمل ايه مع العيال و بعدين عربيتك كلها مراجيح و بتغرى العيال الصغيرة لانها فيها بومبيهات و اعتاب و بعدين انت راكن جنب جامع و الناس بقى اللى داخل و اللى خارج ، المهم انها عشان ما تغلبوش هى فولكس بيتل، المشكلة انى ما كنتش عايز حاجة منهم بس ياخدوا بالهم شوية بدل ما يظهروا اول ما تيجى تطلع عشان يليط العربية بفوطته الزفرة و ياخد جوز الجنيهات و مالوش دعوة بالعربية و هى راكنة ، المهم خدت بعضى و قلت اتكل على الشغل ، طيب هامشى ازاى و هاعمل ايه و مراية الصالون اساسا صغيرة ، قلت يلا اعمل زى ما كل الناس بتعمل و مشيت الوش ماليش دعوة باليمين او الشمال انا ماشى لقدام مش لورا، الغريب انى كنت ماشى زى الحلاوة و لا كلاكس و لا تشويح من حد و لا اى حاجة على عكس لما كنت بابص فى المرايات الجانبية لو حبيت اجى يمين او شمال احتراما للطريق و الغريب انى لما كنت بامشى باحترام كنت باسمع زعيق و كلاكسات و تشويح عشان باحترم الناس ، انما لما بقيت زيهم بقينا بنتكلم لغة واحدة و بنمشى بطريقة واحدة فحصل توافق مع الطريق و اللى ماشيين فى الطريق و بقت العملية زى الفل، قلت طيب اعدى اليوم ده و اشوف بكره ، لقيت العملية احسن و بقيت اجرى و احدف و لا بابص يمين او شمال و العملية برضه زى الفل ، الله هو فى ايه ؟ هى البلد دى ماشية كده و لا ايه ؟ طيب سيبها كمان يوم و ما تشتريش مرايات ، الغريب انى بقيت امشى اسرع و بدون ما حد يبص لى بصة واحدة مع انك لما تحترمهم و تبص يمين او شمال و تدى اشارة برضه مصرين ما يدوكش فرصة تمشى الا لما تطلع ايدك او تطلع كلك من الشباك و تشاور لهم على طريقة احمد حلمى لما نام قدام التاكسى عشان يقف، و اخيرا اتعلمت اللغة السائدة فى هذه الدولة العشوائية التى يسكنها شعب عشوائى
كل شوية يطل علينا سيادة اللواء نجم الفضائيات بتاع الشرطة المتخصصة و المرة دى بقى ايه حاجة اخر تطور ، قال ايه هايركبوا كاميرات فى الشوارع و هايلغوا الكمائن الثابتة ، يااااااااااااااه انت لسه فاكر اننا وصلنا لدرجة لا تقارن من التخلف المرورى و الانضباطى بسبب هذه الكمائن اللى ما لهاش اى شغلانة غير انها تعكنن على خلق الله اللى رايحين شغلهم او يجروا ورا عربية نص نقل شايلة شوية بضاعة بملاليم مش عشان يعملوا له مخالفه لا عشان السبوبة ما تطيرش منهم ، الحق يا جدع ، اجرى يا عسكرى انت و هو اقفش عربية نقل جاية اهى ، و الله تبقى حاجة جميلة لو ركبنا كاميرات بس مش اما نشوف تقييم الاشارات اللى الاخوة العساكر و الامناء الجهابذة خربوها و بيشغلوها يدوى ؟ و ما حدش قادر ينازعهم فى التحكم فى خلق الله و الادهى من ذلك انهم وصلوا لانهم يمشوا العربيات و الاشارة حمراء و يوقفوها و الاشارة خضراء و يكفى زيارة لميدان روكسى او ميدان طلعت حرب عشان تشوفوا على الطبيعة، المشكلة ان الظاهر العساكر و الامناء عندهم عقده نفسية لان كل واحد فيهم بيروح بلده و يحكى و يتحاكى على انه باشارة منه يمشى مصر و باشارة يوقفها ، ازاى تيجى اشارة الكترونية تافهة تنازعه و تاخذ منه هذه الصلاحية ؟ يا سيادة اللواء انزل شوف بنفسك الاشارات المستوردة اللى خربها الجهلاء اللى عند سيادتك و شوف مدى الهرج و المرج اللى بيحصل فى الاشارات و لازم برضه نمشى بالصفارة و اشارة يد العسكرى ، مع ان المفروض ان الاشارات الالكترونية توفر فى اعداد الافراد العاملين بالاشارات و الاستفادة منهم فى اعمال اخرى و لكن السبوبة كده هاتطير، اللى ما قالوش سيادة اللواء ان اكيد الكاميرات دى جاية منحه من دولة متحضرة صعب عليها مصر تبقى بالتخلف و الهرجلة دى ، بس هما للاسف هنا هايستغلوها فى زيادة حصيلة المخالفات مع ان الشعب لو لقى نظام جيد و محترم هايلتزم بيه رغم عشوائيته الدائمة لكن العملية ماشية بالبركة و تقضية واجب و السلام، يا اخواننا الموضوع ابسط مما يكون و المشكلة حلها مش صعب بس يبقى فى شوية ضمير و تطبيق صحيح و كله هايلتزم ، على العموم مبروك يا سيادة اللواء الكاميرات الجديدة و الاستضافات الجديدة فى الفضائيات لانك وحشتنا قوى و ما ظهرتش من ايام قانون المرور الجديد ، بس هو صحيح الحلقة بقت بكام دلوقتى و لا كله ببلاش عشان عيون مصر
