يهمنى الانسان و لو ما لوش عنوان

بقالى فترة بدات تبقى طويلة مش عارف اكتب او ليست لدى رغبة فى الكتابة ، فبعد رمضان و المجهود الكبير الذى بذلناه فى هذا الحر الخليجى الجديد على مصر بعد انتشار الازياء و الافكار الخليجية ، كان ناقص الجو بس و الحمد لله وصل و بقينا زىهم كمان فى الجو، المهم نرجع لسدة النفس ، يمكن يكون سببها الناس و البلد و العيش و العيشة و اللى عايشينها، و التعامل مع اناس مش عايشين على ارض الواقع، حتى محاولة التغيير تصطدم بافكار و اشخاص متطفلين و متحجرين لا يفكرون الا فى الامور المادية حيث لم تعد هناك علاقات انسانية او تعارف مبنى على اسباب انسانية و بشرية ، اعتقد ان الحيوانات ارقى منا فى هذه الاشياء لانهم لا يفكرون فى امور مادية تقف حائلا بين علاقاتهم، و ان حصل و عرفت انسان يدعى انه انسان و على قدر عالى من الثقافة فحتما سيظهر شخص او متطفل ليبعد بينكما بحجة انه يخاف على مصلحتك او مصلحة الشخص الاخر، انها المهزلة المصرية فى زمن كثر فيه من يدعون الحكمة و النبل و التدين و لكنه تدين ظاهرى يخفى اكثر مما يظهر و كل المشاعر و الاحاسيس باطنة و التصرفات صادمة، الحكاية انه لا يهمنى اسمك و لا يهمنى عنوانك و لا لونك و لا ميلادك و لا مكانك، يهمنى الانسان و لو ما لوش عنوان بس فين هو الانسان ؟